Ons land word as die ekonomiese middelpunt van Afrika beskou en hierdie boek sal jou presies wys hoekom dit so is. Danksy jou ervaring in Graad 10 Ekonomie sal jy reeds weet dat hierdie vak alles insluit omtrent die verantwoordelike gebruik van hulpbronne om in ons behoeftes en benodigdhede te voorsien. Daar is natuurlik verskeie diverse faktore wat daarby betrokke is – materieel sowel as sosiaal – en hierdie jaar gaan jy hierdie faktore verder verken. Jy sal ons arbeidsmag en gemengde ekonomie deeglik bestudeer. Jy sal van marksektore en verhoudings tussen markte leer. Jy sal ook aktuele kwessies soos armoede en omgewingsagteruitgang bestudeer en uitvind hoe dit die ekonomiese groei beïnvloed. Jy sal teen die einde van die jaar uiters belangrike kennis en vaardighede ingewin het wat jy in jou lewe kan toepas – nou sowel as in die toekoms.